नुवाकोटमा बाँदर धपाउन गएका नेपालीको मृत्यु

नुवाकोट । नुवाकोटको पन्चकन्यामा बाँदर धपाउन गएका एक जनाको मृत्यु भएको छ ।

मृत्यु हुनेमा कविलासको ५८ वर्षिय गोकर्ण नेपाली रहेको बताइएको छ । नेपालीको बाँदर धपाउने क्रममा अर्धचेत भइ उपचारको लागि काठमाण्डौ लैजादै गर्दा बाटैमा मृत्यु भएको स्थानियले बताएका छन् ।

घटनापछि बाँदरले आक्रमण गरेको भन्ने अफवाह फैलिए पनि त्यस्तो पुष्टि नभएको नुवाकोटका प्रहरी प्रमुख दुर्गाराज रेग्मीले बताए । बारीमा बाँदर आयो कि भनेर हेर्न गएका रहेछन्, तर आक्रमण भने भएको होइन रेग्मीले भने ।

मृतक नेपालीको शरीरमा कुनै चोटपटक नदेखिएको र यसअघि उनलाई तीनपटकसम्म ‘माइनर हर्ट अट्याक’ भइसकेको बताइएको छ । उनमा उच्च रक्तचापको समस्या पनि रहेको वडा अध्यक्ष रामशरण श्रेष्ठले बताए ।

घटनास्थलमा नजिकैको कार्की टोलका स्थानीयले पनि मृतकलाई कराउँदै गरेको देखेका थिए । मृतककी श्रीमती पनि कराउँदै गरेको देखेपछि लौरो बोकेर बाँदर आक्रमण भएको शंका गर्दै पुगेका थिए ।

तर पुगेपछि शरीरमा कुनै चोटपटक नभएको र नेपाली अचेत अवस्थामा रहेको भेटिएको वडाध्यक्ष श्रेष्ठले बताए ।