त्रिशूलीमा ‘तानाकिसी’ अर्थात् हात्ती जात्रा मनाइयो

नुवाकोट । नुवाकोटको त्रिशूलीका स्थानीयले तानाकिसी अर्थात् हात्ती जात्रा मनाएका छन् ।

मङ्गलबार गाईजात्राको अवसरमा नाच नचाउने परम्पराअनुसार उक्त नाच नचाइएको हो । विविध पूजा आराधानसहित विशेष प्रकारले बनाइएको हात्तीलाई बाजागाँजासहित बजारको विभिन्न स्थानमा परिक्रमा गराइएको विदुर नगरपालिका वडा नम्बर १ का वडा सदस्य निजेश श्रेष्ठले बताए ।

त्यस्तै त्रिशूली विकास समुदायका सचिव प्रज्ज्वल सापकोटाले संस्कृति जोगाउन स्थानीय युवाहरुले तानाकिसी अर्थात् हात्ती जात्रा मनाउँदै आईरहेको बताए । उनले युवा पुस्तामा संस्कृति हस्तान्तरणका लागि पनि यस्ता जात्राहरु प्रभावकारी रहने बताए ।

पछिल्लो समय त्रिशुलीको तानाकिसी अर्थात् हात्ती जात्रा निकै प्रख्यात बन्दै गएको छ ।