ईनारपाटीमा खुल्ला ‘६’ ए साईड फुटबल प्रतियोगिता शुरु

नुवाकोट । विदुर ६ ईनारपाटीमा खुल्ला ‘६’ ए साईड फुटबल प्रतियोगिता शुरु भएको छ ।

न्यु ईनारपाटी युवा क्लबको आयोजनामा शुरु भएको प्रतियोगितामा जिल्लाका विभिन्न १३ क्लबहरुको सहभागिता रहेको छ ।
ईनारपाटी (महारानीडिही)को खेल मैदानमा शुरु भएको प्रतियोगिताको उद्घाटन खेलमा गौरेश्वर धाम युवा क्लब र विदुर १२ गौरीवेशीले गोलरिहत वरावरी खेलेका छन् ।

यसअघि प्रतियोगिताको उद्घाटन विदुर नगरपालिका वडा नम्बर ६ का वडाध्यक्ष श्यामकृष्ण चालिसे, जिल्ला खेलकुद समितिका अध्यक्ष विजय गुरुङ लगायतले गरेका थिए ।

प्रतियोगिताको विजेताले उपाधिसहित नगद २२ हजार २ सय २२ रुपैयाँ मेडल, ट्रफी र प्रमाणपत्र हात पार्ने आयोजक क्लबका जीवन कुमालले जानकारी दिए । त्यस्तै उपविजेताले ११ हजार एक सय ११ रुपैयाँसहित मेडल,ट्रफी र प्रमाणपत्र प्राप्त गर्नेछ ।

प्रतियोगिताको उद्घाटन गर्दै वडाध्यक्ष चालिसेले स्थानिय सरकार तथा व्यवसायिक हिसावले आफुले व्यक्तिगत तवरले खेलकुद क्षेत्रको विकासमा सहकार्य गर्न तयार रहेको बताए । उनले न्यु ईनारपार्टी युवा क्लबले निरन्तर फुटवल प्रतियोगिता आयोजना गरिरहेको भन्दै स्थानिय सरकारको तर्फबाट आफुले सकेको सहयोग गर्ने प्रतिवद्धता व्यक्त गरे ।

यस्तै जिल्ला खेलकुद विकास समितिका अध्यक्ष विजय गुरुङले नुवाकोटमा फुटवलको विकास गर्नमा ईनारपार्टीको विशेष भुमिका रहेको भन्दै प्रशंसा गरे । उनले खेलकुद प्रतियोगिता मात्र आयोजना गरेर नहुने भन्दै खेलाडी उत्पादनतिर पनि लाग्नुपर्ने बताए ।

यस्तै नुवाकोट फुटवल संघका अध्यक्ष देवनारायण चित्रकारले फुटवल संघले गर्नुपर्ने काम न्यु ईनारपाटी युवा क्लबले गरिरहेको भन्दै खुशी व्यक्त गरे ।

त्यस्तै विदुर नगरपालिकाका नगर खेलकुद समितिका सभापति अच्युत महन्तराज गिरीले नगरपालिकाले सधै खेलक्षेत्रलाई प्रोत्साहन गरिरहेकोले आगामी दिनमा पनि सकेको सहयोग गर्ने प्रतिवद्धता जनाए ।

प्रतियोगिताको फाइनल सोमवार हुने छ ।