लौके झरना घुम्न आएका चारजनाको प्रहरीद्धारा उद्दार

नुवाकोट । नुवाकोटको शिवपुरी गाउँपालिका वडा नम्बर ८ छहरे खोलामा रहेको लौके झरनामा घुम्न गएका ४ जनाको उद्धार गरिएको छ ।

लौके झरनामा घुम्न गएका ४ जना मानिसहरू खोलामा बाढी आई खोला तर्न नसकेर खोला पारी नै फसेपछि प्रहरीको सहायताले उनीहरुलाई उद्धार गरिएको हो ।

नुवाकोटका प्रमुख जिल्ला अधिकारी शशिधर घिमिरे र जिल्ला प्रहरी कार्यालय नुवाकोटका कार्यालय प्रमुख प्रहरी उपरीक्षक दुर्गाराज रेग्मीको कमाण्डमा खटिएको १० जनाको प्रहरी टोली र अस्थाई प्रहरी पोष्ट छहरेबाट खटिएको टोलीले उनीहरुलाई उद्धार गरेको हो ।

उद्धार गरिनेमा काठमाडौको सातदोबाटो बस्ने लक्ष्मि शिंखडा, नुवाकोटको शिवपुरी गाउँपालिका ८ वस्ने अनिश नेपाली, कृष्ण नेपाली र राजेश नेपाली रहेको जिल्ला प्रहरी कार्यालय नुवाकोटले जनाएको छ ।

खोलामा बाढी आएपछि खोला तर्न नसकेर उनीहरु अलपत्र परेका थिए । प्रहरीको उद्धारपछि उनीहरु आफ्नो गन्तव्यतर्फ लागेका छन् ।