शिवपुरीको विभिन्न स्थानमा पहिरो, गुर्जे–खोलेगाउँ सडक अवरुद्ध

विदुर खबर २०८२ साउन १२ गते १०:५६

नुवाकोट । शिवपुरी गाउँपालिकाको विभिन्न स्थानमा पहिरोले जनजीवन प्रभावित बनाएको छ ।

वडा नम्बर ४ मा लप्सेस्थित स्थानीय ठाकुर थापाको गोठ समेत पहिरोले बगाएको पुष्टि भएको छ भने घरमा आंशिक क्षति पुर्याएको छ । गोठमा रहेका सामग्री र संरचना पूर्णरूपमा क्षति भएको छ भने पशुचौपायाको भने उद्धार गरिएको छ ।

यसैबीच, गुर्जे-खोलेगाउँ सडकखण्ड अन्तर्गत खोलेगाउँमा गएको पहिरोले राजु लामाको मोटरसाइकल पनि पुरिएको छ। सडकमा ठूलो मात्रामा माटो र ढुंगामाटो थुप्रिएपछि सवारी आवागमन पूर्णरूपमा बन्द भएको स्थानीयले बताएका छन ।

त्यस्तै, मध्यपहाडी लोकमार्ग नजिकै शिवपुरी- ५ मा पर्ने सिलामे जाने चोक नजिकै ठूलो रुख ढल्दा अर्को सिलामे सडकखण्डमा समेत आवागमनमा अवरोध सिर्जना भएको छ ।

स्थानीयवासीहरूका अनुसार राति करिब ११ बजेदेखि पहिरो खस्न थालेपछि सम्पर्क विच्छेद भएको थियो । हालसम्म मानवीय क्षतिको खबर छैन तर थप पहिरोको सम्भावना रहेकाले स्थानीय प्रशासनले सतर्कता अपनाउन आग्रह गरेको छ ।

सडक खुलाउने र पहिरो प्रभावित क्षेत्रको जोखिम मूल्याङ्कनका लागि स्थानीय तह र प्रशासनको टोली परिचालन हुने तयारीमा रहेको जनाइएको छ।