बट्टारको शुक्रपथ सहकारीका अध्यक्ष र संचालक पक्राउ

नुवाकोट । बचत रकम अपचलनको आरोपमा नुवाकोटको विदुर २ बट्टारमा रहेको शुक्रपथ बहुउदेश्यीय सहकारी संस्था लिमिटेडका अध्यक्ष र संचालक सदस्यसहित केही कर्मचारी पक्राउ परेका छन् ।

पक्राउ पर्नेहरुमा संचालक समितिका अध्यक्ष निरहरि उपाध्याय, सदस्य जीवनराज ओझा र शाखा प्रमुख जयवहादुर थापासहित केही कर्मचारीलाई जिल्ला प्रहरी कार्यालय नुवाकोटले पक्राउ गरेर नियन्त्रणमा लिएको छ ।

बचतकर्ताहरुले तत्काल आफुहरुको बचत रकम फिर्ता गर्नुपर्ने माग राखेपछि संचालक समितिका अध्यक्ष, सदस्य तथा शाखा प्रमुखले केही जवाफ दिन सकेनन् । उनीहरुले बचतकर्ताको रकम फिर्ता गर्न केही समय लाग्ने र त्यसको लागि केही समय दिन माग गरेपछि बचतकर्ताहरु आक्रोशित भएका थिए ।

शहकारीले अहिलेसम्म जिल्लामा झण्डै ४ करोड ८० लाख रुपैयाँ निक्षेप संकलन गरि झण्डै २ करोड ८० लाख रुपैयाँ ऋण लगानी गरेको संचालक समितिका अध्यक्ष उपाध्यायले बताए । उनले बचतकर्ताहरुको रकम जसरी पनि फिर्ता गर्ने भन्दै आफुहरुलाई केही समय दिन माग गरेका थिए । उनले काठमाण्डौका केही शाखामा समेत समस्या देखिएकोले निक्षेप फिर्ता गर्न समस्या भएको बताए । उपाध्ययले शहकारीले जग्गामा लगानी गरेको र निक्षेपकर्तालाई त्यही जग्गा दिने वा बेचेर रकम फिर्ता गर्न आफुहरु तयार रहेको बताए ।

यस्तै शाखा प्रमुख जय वहादुर थापाले सहकारीमा लामो समयदेखि समस्या देखिएपनि संचालक समितिका पदाधिकारीको दवावमा आफुले काम गरिरहेको बताए । उनले पछिल्लो समय सहकारीमा समस्या देखिएपछि पछि १५ जनाबाट कर्मचारी पनि ५ जनामा झारिएको उल्लेख गरे ।

आईतवार विहानैदेखि बजारमा सहकारी भाग्न खोजेको हल्ला फैलिएपछि बचतकर्ताहरुले सहकारीको भवन भरिएको थियो । उनीहरुले आफुहरुका रकम फिर्ता गर्न नसकेर कर्मचारीहरु भाग्न खोजेपछिे नियन्त्रणमा लिएर प्रहरीलाई बुझाएका हुन् । सहकारीका कर्मचारीहरुलाई विहानैदेखि बचतकर्ताले केरकार गर्न शुरु गरेपछि संचालक समितिका अध्यक्ष निरहरि उपाध्याय र सदस्य जीवनराज ओझालाई फोन गरेर बोलाएका थिए ।

सहकारीमा सामान्य अवस्था होला भन्ने सोचेर आएका अध्यक्ष र सदस्य जव समस्यामा परे तव उनीहरु बचतकर्ताको घेराउमा परे । बचतकर्ताले अन्य संचालन समितिका सदस्यसहित प्रमुख कार्यकारी अधिकृतलाई बोलाउन माग गरेपछि उनीहरु थव दवावमा परेका थिए । तर संचालक समितिका सदस्य तथा प्रमुख कार्यकारी अधिकृत नरेन्द्र विष्ट आउँछु भन्दै नआएपछि बचतकर्ता थप आक्रोशित भएका थिए ।

पछि वडा नम्बर २ का वडासदस्यको रोहवरमा उनीहरुलाई पक्राउ गरि हिरासतमा लिगएको छ भने सहकारीको कार्यालयमा प्रहरीले शिल गरेको छ ।

सहकारीमा झण्र्डै एक हजार जना सदस्यले ५ सय रुयैयाँदेखि ५० हजार रुपैयाँसम्मको रमक बचत गरेका छन् । उनीहरुले आफ्नो बचत रकम तत्काल फिर्ता गर्ने वातावरण बनाइदिन सरोकारवालाहरुसँग माग गरेका छन् ।