संगम सहकारीको २८ औ वार्षिक साधारणसभा सम्पन्न

नुवाकोट । विदुर ४ बट्टारमा रहेको संगम बचत तथा ऋण सहकारी संस्था लिमिटेडको २८ औ वार्षिक साधारणसभा तथा २८ औ वार्षिकउत्सव सोमवार सम्पन्न भएको छ ।

सहकारी साधारणसभाको उद्घाटन गर्दै विदुर नगरपालिकाका मेयर राजन श्रेष्ठले सहकारी क्षेत्र चलायमान नभएसम्म देशको अर्थतन्त्र सुधार हुन नसक्ने बताए । उनले केही सहकारीमा समस्या भएपनि वित्तीय अनुशासनमा चलिरहेका सहकारीहरूमा बाहिर प्रचार भए जस्तो समस्या नरहेको उल्लेख गरे ।  मेयर श्रेष्ठले समुदायमा आधारित सहकारीमा तरलता बढी भएकोले सोतर्फ पनि सचेत रहन सुझाव दिए ।

कार्यक्रममा जिल्ला सहकारी संघ नुवाकोटका अध्यक्ष गोकर्णनाथ न्यौपानेले सरकारले सहकारी संस्थाको नियमन गर्न अध्यादेश ल्याएको निति सहकारीको हितमा नरहेको बताए । उनले सहकारीको बचत संकलनमा सरकारले अंकुश लगाएको बताए ।

यस्तै नुवाकोट जिल्ला बचत तथा ऋण सहकारी संघका अध्यक्ष नारायण श्रेष्ठले संगम सहकारी जिल्लाकै उत्कृष्ट सहकारी रहेको भन्दै खुशी व्यक्त गरे । उनले दुखमा सहकारी र सुखमा सहकारी भन्ने मुल मर्म बोकेर काम गरिरहेको बताए ।

त्यस्तै साधारणसभामा राष्ट्रिय सहकारी बैंक नुवाकोटका संयोजक बैकुण्ठ मिश्रले सहकारी संस्थाको नियमन र बचतकर्ताको डुबेको रकम फिर्ता गर्ने उद्देश्यले सरकारले अध्यादेशमार्फत सहकारीसम्बन्धी अध्यादेश ल्याएको बताए ।

साधारणसभामा अध्यक्षको प्रतिवेदन प्रस्तुत गर्दे केशव मिश्रले २०८०÷८१ मा निक्षेप ९.९२ प्रतिशतले बृद्धि भएर २९ करोड ६ लाख ४८ हजार ६ सय ९८ रुपैयाँ पुगेको बताए । उनले सहकारीले सहकारीले कर तिरेर कुल ११ लाख ६५ हजार ३ सय ७ रुपैयाँ खुद नाफा कमाउन सफल भएको बताए ।

यस्तै कोषाध्यक्ष शनि चित्रकारले बजेट कार्यक्रम तथा प्रगति प्रतिवेदन प्रस्तुत गर्दै आर्थिक वर्ष २०८०÷८१ मा सहकारीले बिस करोड ७६ लाख ९१ हजार ६ सय ८० रुपैयाँ कर्जा लगानी गरेको बताए । त्यस्तै सहकारीले आर्थिक वर्ष २०८०÷८१ मा २ करोड ६२ लाख २० हजार ५ सय रुपैयाँ बचत संकलन गरेको छ ।

यस्तै सहकारीको आर्थिक वर्ष २०८०÷८१ को आर्थिक प्रतिवेदन अनुसार शेयर पूँजी बृद्धि भई २ करोड ७३ लाख ३ हजार ४ सय रुपैयाँ पुगेको छ ।

साधारणसभाको अवसरमा सहकारीले उत्कृष्ट कारोवार गरेको आधारमा विभिन्न व्यक्तिहरुलाई सम्मान गरेको छ । सम्मानित हुनेमा बचततर्फ योगमाया श्रेष्ठ, ऋणतर्फ मंगली तामाङ र बावुनानीतर्फ सुहना प्याकुरेल सम्मानित भएका छन् ।

यस्तै जिल्लास्तरीय हस्तलेखन प्रतियोगितामा नेपाली विद्यातर्फ प्रथम भएकी विन्दुकेश्वर माविका सोनिया तिमिल्सना, सुभेनियर बोर्डिङ स्कुलका जस्मिन सेढाई र सेई बोर्डिङ स्कुलका श्रेयालाई नगदसहित सम्मान गरिएको थियो ।

यस्तै अंग्रेजी विधातर्फ सुभेनियर बोर्डिङ स्कुलका जस्मिन सेढाइ, विन्दुकेश्वर माविका सोनिया तिमिल्सना र नेशनल बेथल एकेडेमीका सोम्या तामाङलाई पनि नगदसहित सम्मान गरिएको छ ।

 

२०५३ साल पुष १५ गते जिल्ला सहकारी कार्यालय नुवाकोटमा दर्ता भएर स्थापना भई कारोवार गर्दै आएको सहकारीको हाल झन्डै २५ सयभन्दा शेयरधनी रहेका छन् ।