कोलडाँडा–खोलेबेसी सडकको स्तरोन्नतिको प्रक्रिया शुरु

नुवाकोट । नुवाकोटको तारकेश्वर गाउँपालिका वडा नम्बर २ को कोलडाँडा–आरुबोटे–बगुवा–खोलेबेसी सडकको कलोपत्रे र ढलानसहित स्तरोन्नति प्रक्रिया शुरु भएको छ ।

आईतवार गाउँपलिका अध्यक्ष शिव अधिकारीको नेतृत्वमा गाउँपलिकाको प्रविधिक टोलीले नापजाँच गरी कलोपत्रे प्रक्रिया अघि बढाएको हो । प्रदेश सरकारको १ करोड र गाउँपालिकाको १ करोड गरी २ करोडको लागतमा हुने स्तरोन्नतिको लागि डिपिआर भइसकेको छ भने कोलडाँडादेखि आरुबोटेसम्मको खण्ड गतवर्ष नै कालोपत्रे भइसकेको छ ।

आज सडकको विभिन्न स्थलहरुको स्थलगत अनुगमनपछि अध्यक्ष अधिकारीले तत्कालै प्रक्रिया सुरु गरेर सडक स्तरोन्नतिको काम थाल्न निर्देशन दिए ।

उनले विकास निर्माणका काममा ढिलासुस्ती गरेर बर्खा लागेपछि काम सुरु गर्ने प्रवृत्तिलाई त्याग्दै हिउँदमै काम सम्पन्न गर्नुपर्ने बताए ।

अध्यक्ष अधिकारीले सडक निर्माणमा कुनै सम्झौता नगर्ने उल्लेख गरे ।