टिमुरे यातायातको दुर्घटना न्यूनीकरण गर्न सवारी चालकहरुलाई प्रशिक्षण

नुवाकोट । नुवाकोटको त्रिशुलीमा रहेको टिमुरे यातायात प्रालिले सवारी चालकहरुलाई स्थलगत अनुगमन गरि प्रशिक्षण गराएको छ ।

सडकहरुमा भइरहने बढ्दो सवारी दुर्घटनाको न्यूनीकरण र यसबाट हुने मानवीय क्षतिलाई कम गर्ने उद्देश्यले बुधवार टोखा–छहरे सडकमार्ग भएर गुड्जे सवारी साधनका चालकहरुलाई प्रशिक्षण दिइएको हो ।

टिमुरे यातायात प्रालिको आयोजना तथा जिल्ला ट्राफिक कार्यालय नुवाकोटको सह–आयोजनामा भएको कार्यक्रममा सवारी चालकहरुलाई दुर्घटना न्यूनीकरणका लागि अनुशासित र मर्यादित बनाइ धनजनको क्षति रोक्न सकिन्छ भन्ने उद्देश्यले स्थलगत प्रशिक्षण गरिएको टिमुरे यातायात प्रालिका अध्यक्ष प्रकाश जोशीले जानकारी दिए ।

चालक तथा मजदुरहरुलाई पेशाप्रति सचेत र जिम्मेवार बनाउने तथा यातायात क्षेत्रलाई मर्यादित र अनुशासित बनाई समाजमा सुरक्षित यात्रा प्रदान गर्न प्रशिक्षण कार्यक्रम कोशेढुंगा सावित हुने जोशीको भनाइ छ । प्रत्येक वर्ष सवारी दुर्घटनामा करोडौं रकम खर्चिनुपरेको बताउँदै यसलाई केही हदसम्म यस्ता प्रशिक्षण कार्यक्रमले कम गर्ने बताए ।

प्रशिक्षणको दौरान चालकहरुलाई ट्राफिक नियमका साथै सडकको अवस्थावारे समेत जानकारी गराइएको थियो । सवारी चलाउँदा सिट क्षमता अनुसार यात्रु राख्ने, हेलमेट लगाउने, सवारी चालकले मदिरा सेवन नगर्ने, सवारी साधनको नियमित चेक जाँच लगायतका विषयमा प्रशिक्षण दिइएको थियो ।

कार्यक्रममा जिल्ला ट्राफिक कार्यालय नुवाकोटका प्रमुख प्रहरी निरिक्षक अशुतोष बहादुर शाहीले धेरै दुर्घटनाको कारण चालक हुने गरेकोले सडकमै बसरे सवारी चालकहरुलाई प्रशिक्षण दिएको बताए ।

उनले चालकहरूलाई ट्राफिक नियमको बारेमा प्रशिक्षण दिने र दुर्घटना कम गराउने उद्देश्यका साथ अभियान संचालन गरिएको बताए । कहाँ रोक्ने, कसरी यात्रु ओराल्ने भन्ने कुरा व्यवहारमा लागु गराउनका लागि पनि हामीले सडकै चालकहरुलाई ट्राफिक नियम सम्बन्धि प्रशिक्षण दिएका हौ, उनले भने ।

कार्यक्रममा लामो तथा छोटो दुरीमा सवारीसाधन चलाउने एकसयभन्दा बढी चालकहरुलाई सडकमा नै प्रशिक्षण दिइएको थियो । सचेतना मूलक प्रशिक्षणपछि यात्रु र चालकबीचको सम्बन्ध सुमधुर हुनुका साथै दुर्घटना समेत न्युनिकरण हुने सरोकारवालाहरुले विश्वास लिएका छन् ।

कार्यक्रममा विभिन्न सरोकारवाला निकायहरुको उपस्थिति रहेको थियो ।