नुवाकोटमा मृत्यु दर्ता गराउनेलाई ५ हजार दिइने

नुवाकोट । नुवाकोटको विदुर नगरपालिका वडा नम्बर ५ ले मृत्यु दर्ता ३५ दिनभित्र गरेमा पाँच हजार रुपैयाँ दिने भएको छ ।

विदुर नगरपालिका वडा नम्बर ५ को कार्यालयले आर्थिक वर्ष २०८१÷८२ बाट लागु हुने गरि ३५ दिन भित्र मृत्यु दर्ता गर्ने मृतकका परिवारलाई ५ हजार रुपैया सहयोग दिने निर्णय गरेको छ । वडा कार्यालयले सो रुपैयाँ प्रदान गर्नको लागि आगामी असार ७ गते हुन गइरहेको नगरपालिकाको नगरपरिषदमा वडा स्तरिय बिबिध कार्यक्रमबाट सम्बोधन गर्ने निर्णय गरेको वडाध्यक्ष लिलानाथ न्यौपानेले जानकारी दिए ।

व्यक्तिगत घटना दर्ता प्रक्रियालाई सहज बनाउने उद्देश्यले वडा कार्यालयले प्रोत्साहन रकम उपलब्ध गराउने योजना बनाएको वडाध्यक्ष न्यौपानेको भनाई रहेको छ । वडा कार्यालयले तोकिएको समयमा मृत्यु दर्ता गरेमा मृतक परिवारलाई रु पाँच हजार प्रोत्साहन रकम उपलब्ध गराउने छ । जन्म र मृत्युको जानकारी समयमै पाएमा घटना दर्ता प्रक्रियासमेत सहज हुने भएकाले प्रोत्साहन रकम उपलब्ध गराउन लागिएको हो, वडाध्यक्ष न्यौपानेले भने, “यो प्रक्रिया आगामी आवदेखि लागू हुनेछ ।”

यसअघि विदुर ५ को वडा कार्यालयले बच्चा जन्मिएको ३५ दिनभित्र जन्मदर्ता गर्नेलाई पाँच हजार रुपैयाँ उपलब्ध गराउँदै आएको छ । बच्चा जन्मेपछि ३५ दिनभित्र जन्मदर्ता गराउनेलाई प्रोत्साहन गर्न र वयस्क हुने समयमा बैंक खातामा केही रकम सुनिश्चत होस् भन्ने उद्देश्यले बच्चाको जन्मदर्तासँगै पाँच हजार बैंक दाखिला गराउन थालिएको हो ।

बच्चाको जन्मदर्ता गराएसँगै उक्त बच्चाका नाममा बैंकमा खाता खोल्न लगाई सम्बन्धित अभिभावकलाई पाँच हजार रुपैयाँ जम्मा गर्न लगाएर वडा कार्यालयले थप पाँच हजार रुपैयाँ जम्मा गरिदिने गरेको छ ।

वडाध्यक्ष न्यौपानेलेका अनुसार चालु आर्थिक वर्षबाट कार्यान्वयनमा ल्याइएको उक्त कार्यक्रमबाट हालसम्म ५० बच्चाको खातामा रकम दाखिला भइसकेको छ । बच्चाको जन्मदर्ता गराउन र जन्मेलगत्तै बैंक खाता सुनिश्चित बनाउन नगद जम्मा गर्ने व्यवस्था मिलाउन सुरु गरेका हौँ , वडाध्यक्ष न्यौपानेले भने, जम्मा भएको रकम बच्चा वयस्क भएपछि झिक्न पाउने नियम बनाएका छौँ ।

वडा नं ५ मा दलित, कुमाल, आदिवासी जनजातिसहितका निम्न तथा श्रमिक वर्गको बाहुल्यता धेरै छ । अहिले जन्मिएका बच्चा वयस्क हुदाँका बखत खातामा केही रकम सुनिश्चित गराउन कार्यक्रमलाई केन्द्रित गराउने वडाध्यक्ष न्यौपानेको भनाइ छ । वडा कार्यालय र सम्बन्धित अभिभावकबाट अहिले पाँच हजारका दरमा बैंक खातामा रकम जम्मा हुने भए पनि निकाल्ने समयमा त्यसको सात आठगुणा बढी पुग्ने जानकारी पाएको उनले बताए ।

वडा कार्यालयले बच्चाको सम्मानमा नगद जम्मा गर्ने कार्यक्रम ल्याएपछि अभिभावकले बच्चा जन्मेको ३५ दिन पूरा नहँदै जन्मदर्ता गराउन थालेका छन् ।