देविघाटमा कृष्टलको माला बनाउने तालिम सम्पन्न

नुवाकोट । विदुर नगरपालिका वडा नम्बर ५ देविघाटमा महिलाहरुको लागि १० दिने (कृष्टल ) पोतेको माला बनाउने तालिम सम्पन्न भएको छ ।

विदुर नगरपालिकाको आर्थिक सहयोग र विदुर नगरपालिका वडा नम्बर ५ को कार्यालयको आयोजनमा तालिम सम्पन्न भएको हो ।
तालिमको समापन कार्यक्रममा बोल्दै विदुर नगरपालिकाकी उपमेयर प्रभा बोगटीले महिलाहरूलाई आर्थिक रूपमा सबल बनाउने उद्देश्यका साथ तालिमको आयोजना गरिएको बताइन् ।

उनले तालिममा सिकेका सीपलाई व्यवहारमा उतार्न आग्रह गरिन् । उपमेयर बोगटीले विदुर नगरपालिकाले महिला लक्षित शसक्तिकरण र आत्मनिर्भरको कार्यक्रम ल्याइरहेको चन्दै त्यसबाट महिलाहरुले लाभ लिन सक्नुपर्ने बताइन् ।

यस्तै कार्यक्रममा विदुर नगरपालिका वडा नम्बर ५ का वडाध्यक्ष लिलानाथ न्यौपानेले महिलाहरुले उत्पादन गरेका सामाग्री वडा कार्यालयले नै खरिद गरिदिने प्रतिवद्धता व्यक्त गरे । तपाईहरुले सकेको सामाग्री उत्पादन दिनुस, उत्पादित सामानले बजार नपाउने भन्ने हुन्न, विक्री नभए वडाले आफै किनिदिन्छ, वडाध्यक्ष न्यौपानेले भने ।

उनले महिलाहरूलाई सीप विकासमार्फत आत्मनिर्भर बनाउने उद्देश्यले तालिम आयोजना गरिएको बताए ।

यस्तै बजारमा सुनचाँदीका गरगहना भन्दा पनि क्रिष्टलका मालाको माग बढिरहेकोले महिलाहरुले बनाएको मालालाई बिक्री गर्न बजारीकरणको अभाव नभएको स्थानिय सरस्वती न्यौपानेले बताइन् ।

१० दिनसम्म संचालन भएको तालिममा १७ जनाको सहभागिता रहेको थियो । उनीहरुलाई प्रशिक्षक गंगा बोगटीले सहजीकरण गरेकी थिइन् ।