देविघाटमा कृष्टलको माला बनाउने तालिम शुरु

नुवाकोट । नुवाकोटको विदुर नगरपालिका वडा नम्बर ५ देविघाटमा सोमवारदेखि महिलाहरुको लागि १० दिने (कृष्टल ) पोतेको माला बनाउने तालिम शुरु भएको छ ।

विदुर नगरपालिकाको आर्थिक सहयोग र विदुर नगरपालिका वडा नम्बर ५ को कार्यालयको आयोजनमा तालिम शुरु भएको हो ।

तालिमको उद्घाटन गर्दै नगरपालिकाका मेयर राजन श्रेष्ठले तालिममा सिकेका सीपलाई व्यवहारमा उतार्न आग्रह गरे । उनले सीप सिकेर मात्र नहुने भन्दै त्यसलाई व्यवसायिक जीवनमा लगाउन समेत आग्रह गरे ।

यस्तै कार्यक्रममा विदुर नगरपालिकाकी उपमेयर प्रभा बोगटीले महिलाहरूलाई आर्थिक रूपमा सबल बनाउने उद्देश्यका साथ तालिमको आयोजना गरिएको बताइन् । उनले समुदायको आर्थिक, सामाजिक र सांस्कृतिक रूपान्तरणमा यस्ता तालिमले महत्वपुर्ण भुमिका खेल्ने बताइन् ।

कार्यक्रममा विदुर नगरपालिका वडा नम्बर ५ का वडाध्यक्ष लिलानाथ न्यौपानेले महिलाहरूलाई सीप विकासमार्फत आत्मनिर्भर बनाउने उद्देश्यले तालिम आयोजना गरिएको बताए । उनले जिल्लाको सबै वडाभन्दा विदुर ५ भिन्न रहेकोले कृष्टलको मालाको लागि बजारको अभाव नहुने बताए ।

यस्तै बजारमा सुनचाँदीका गरगहना भन्दा पनि क्रिष्टलका मालाको माग बढिरहेकोले महिलाहरुले बनाएको मालालाई बिक्री गर्न बजारीकरणको अभाव नभएको स्थानिय सरस्वती न्यौपानेले बताइन् ।

तालिममा १७ जनाको सहभागिता रहेको छ । उनीहरुलाई प्रशिक्षक गंगा बोगटीले सहजीकरण गरिरहेका छन् । तालिम आगामी ३० गतेसम्म संचालन हुने छ ।

तालिम उद्घाटन कार्यक्रममा जिल्ला समन्वय समिति नुवाकोटका सदस्य सन्तोषी देवकोटा, विदुर ५ का वडासदस्य विनोद चित्रकार लगायतको उपस्थिति रहेको थियो ।