नुवाकोटको किस्पाङमा भाईद्धारा दाईको हत्या

नुवाकोट । नुवाकोटको किस्पाङ गाउँपालिका वडा नम्बर ५ मानेगाउँमा आफ्नै भाईले खुकुरी प्रहार गरि दाईको हत्या गरेका छन् ।

सोमवार साँझ साढे सात बजेको समयमा स्थानिय ७२ वर्षिय खमसिङ तामाङ आफ्नै घर अगाडी मृत अवस्थामा फेला परेको प्रहरीले जनाएको छ ।

दाजुभाईबिच जग्गाको बिवादको कारण भाईले दाईको हत्या गरेको हुनसक्ने जिल्ला प्रहरी कार्यालय नुवाकोटका प्रहरी नायव उपरीक्षक तिलक भारतीले जानकारी दिए ।

घटनाको सुचना पाउने बित्तिकै प्रहरी चौकी मैलुङबाट प्रहरीको टोली पुगेको थियो भने जिल्ला प्रहरी कार्यालय नुवाकोटका प्रहरी नायव उपरीक्षक तिलक भारतीको कामाण्डमा अनुसन्धान अधिकृत सहितको टोली समेत पुगेको थियो ।

घटनाको प्रारम्भिक अनुसन्धानको क्रममा दाजु भाई बिचको जग्गा बिवादको कारण हत्या भएको प्रहरीले जनाएको छ ।

दाजुको हत्या गरेको आरोपमा ६७ वर्षिइ सिंहबहादुर तामाङलाई प्रहरीले पक्राउ गरेको छ । उनलाई आफ्नै घरको माथिल्लो तलामा लुकीरहेको अवस्थामा पक्राउ गरिएको प्रहरीले जनाएको छ ।

उनको साथबाट खुकुरी समेत वरामद गरिएको जिल्ला प्रहरी कार्यालय नुवाकोटले जनाएको छ । घटनाको विषयमा थप अनुसन्धान जारी छ ।

त्यस्तै मृतकको शव पोष्टर्माटमको लागि जिल्ला अस्पताल त्रिशुलीमा ल्याइएको प्रहरीले जनाएको छ ।