न्यु भिजन युवा क्लब फाईनलमा, उपाधिको लागि बट्टारसँग खेल्ने

नुवाकोट । न्यु भिजन युवा क्लब बट्टारमा जारी प्रथम स्वर्गिय ध्रुव अमात्य स्मृति कप २०८१ नुवाकोट जिल्ला क्लबस्तरीय फुटबल प्रतियोगिताको फाईनलमा प्रवेश गरेको छ ।

शुक्रवार भएको दोस्रो सेमिफाईनल खेलमा थ्रि डि युवा क्लब कोलानीलाई २–१ गोल अन्तरले पराजित गर्दे रातमाटेको क्लब न्यु भिजन फाईनल प्रवेश गरेको हो ।

न्यु भिजनलाई जित दिलाउन खेलको ५२ औ मिनेटमा जर्सी नम्बर १० का निर्माण तामाङ र खेलको ७४ औ मिनेटमा जर्सी नम्बर ७ का भत्तवहादुर रिमाल (किस्मत) ले गोल गरेका थिए ।

त्यस्तै थ्रि डि युवा क्लबको तर्फबाट खेलको ५६ औ मिनेटमा जर्सी नम्बर १३ का सौगात तामाङले सात्वना गोल फर्काएका थिए । फाईनल प्रवेश गरेको न्यु भिजन युवा क्लबले उपाधिको लागि आयोजक टोली बट्टार युथ क्लबसँग प्रतिष्पर्धा गर्ने छ ।

शुक्रवार नै भएको पहिलो सेमिफाईनलमा आयोजक बट्टार युथ क्लबले तप्त युवा क्लबलाई ट्राईब्रेकरमा ४–२ गोल अन्तरले पराजित गर्दै फाईनल प्रवेश गरेको हो ।

फाईनल खेल शनिवार दिउँसो २ बजे हुने छ । प्रतियोगिताको विजेताले एकलाख रुपैयाँ प्राप्त गर्नेछन् भने दोस्रो हुनेले ५० हजार रुपैयाँ प्राप्त गर्ने आयोजक बट्टार युथ क्लबका अध्यक्ष सुरज श्रेष्ठले जानकारी दिए ।