नुवाकोटमा शनिवार हार्डवेयर पसल खोले कारवाही गरिने

नुवाकोट । नुवाकोटमा शनिवार हार्डवेयर पसल खोले कारवाही हुने भएको छ ।

हप्ताको एक दिन पसल बन्द गर्ने व्यवसायीको सल्लाह अनुसार नुवाकोट निर्माण सामग्री व्यवसायी संघले प्रत्येक शनिबार हार्डवेयर (निर्माण सामग्री पसल) बन्द गर्ने निर्णय गरेको हो ।

उक्त दिन हार्डवेयर पसल खोले जरिवाना तिर्नुपर्ने भएको छ । संघको आह्वानलाई साथ दिँदै गत हप्तादेखि जिल्लाभरिका निर्माण सामग्रीका पसल बन्द गरिएको छ ।

संघले हार्डवेयर (निर्माण सामग्री) पसल बन्द हुने जानकारी सम्पूर्ण ग्राहक तथा उपभोक्तालाई सञ्चारमाध्यम र पसल÷पसलमा सूचना बोर्ड राखेर जानकारी गराइसकेको छ ।

शनिबार निर्माण सामग्रीका पसल, गोदाम, शोरुम साथै सामग्री लोड–अनलोड गर्ने कामसमेत पूर्ण रूपले बन्द रहने सब्घले बताएको छ ।

कोही कसैले उक्त दिन पसल, गोदाम, शोरुम खोले दुई हजार रुपैयाँ र निर्माण सामग्री लोड–अनलोड गरेमा पाँच हजार रुपैयाँ जरिवाना गरिने संघका अध्यक्ष नवीनकृष्ण राजभण्डारीले बताए ।