नुवाकोट-रसुवा डेढ महिनापछि सिधा सडक सम्पर्कमा

नुवाकोट। भोटेकोशीमा बाढी आएको डेढ महिनापछि रसुवा र नुवाकोट सिधा सडक सम्पर्कमा जोडिएका छन् ।

दुई जिल्ला जोड्ने फलाखु खोलामा बेलिब्रिज जडान गरिएसँगै आइतबारदेखि सवारीसाधन चल्न थालेका छन् ।

नेपाली सेनाको सहयोगमा बेलिब्रिज जडान गरिएको हो । बेलिब्रिज जडानपछि नुवाकोट-रसुवा सवारीसाधन चल्न थालेको गल्छी-त्रिशूली-मैलुङ-स्याफ्रुबेंसी-रसुवागढी सडक योजना, विदुरका योजना प्रमुख कृष्णनाथ ओझाले बताए ।

ढुंगे बजारदेखि नुवाकोट-रसुवाको सीमा क्षेत्र बेत्रावतीसम्मको दूरी १० किलोमिटर छ । भदौ १० को बाढीले पुल र सडक बगाउँदा दुई जिल्लाबीचको सडक सम्पर्क टुटेको थियो ।

ओझाका अनुसार फलाखु खोलामा ७३ मिटर लामो बेलिब्रिज जडान गरिएको हो । स्याफ्रुबेंसीमा पनि बेलिब्रिज जडानको तयारी थालिसकिएको उनले बताए ।

स्याफ्रुबेंसीमा पुलको फाउन्डेसन निर्माणका लागि खोलाको दुवैतर्फ एप्रोच रोड तयार भएको पूर्वाधार विकासमन्त्री सुनिल लम्सालले बताए । अब स्याफ्रुबेंसीमा पुल निर्माणको कामले थप गति लिने उनको भनाइ छ ।

यसअघि नुवाकोटको उत्तरगया पब्लिक स्कुलनजिकैको ३०० मिटर लामो भिरमा सडकको ट्र्याक खोलेर बेत्रावतीसम्म सडक पुर्‍याइएको थियो ।

अप्ठ्यारो भिर भएकाले नेपाली सेनाको सहयोगमा विस्फोट गराएर ट्र्याक खोलिएको थियो ।