ढुङ्गे-त्रिशूली जोड्ने बेलिब्रिज निर्माणका लागि संयुक्त स्थलगत निरीक्षण

नुवाकोट । विदुर नगरपालिका वडा नं. १ स्थित ढुङ्गे र त्रिशूली बजारलाई जोड्नका लागि बेलिब्रिज निर्माणको प्रक्रिया तीव्र रूपमा अघि बढेको छ।

विदुर नगरपालिकाले परामर्शदातातर्फबाट प्राविधिक अध्ययन र डिजाइन तयार पारिसकेपछि निर्माणको थप प्रक्रिया अघि बढाएको हो।

नगरपालिकाले करिब ७० मिटर लम्बाईको बेलिब्रिज उपलब्ध गराउन सडक विभागलाई गरेको पत्राचारमा विभागबाट सकारात्मक जवाफ प्राप्त भइसकेको छ। साथै, पुल जडानका लागि नेपाली सेनासँग गरिएको आग्रहलाई समेत सेनाले स्वीकार गरेको छ।

पुल जडानमा लाग्ने सम्पूर्ण खर्च र दायित्व विदुर नगरपालिका आफैँले ब्यहोर्ने भएको छ।

यसैक्रममा बेलिब्रिज जडानको थप प्राविधिक तयारी र अध्ययनका लागि नगर प्रमुख राजन श्रेष्ठ, प्रमुख जिल्ला अधिकारी शम्भुप्रसाद रेग्मी, नेपाली सेनाका जर्नेल सुवासजंग थापा, उपप्रमुख प्रभा बोगटी, सडक डिभिजन नुवाकोटका प्रमुख बद्री शर्मा तथा विभिन्न वडाका अध्यक्षहरू र प्राविधिक टोलीले स्थलगत अवलोकन गरेका छन्।

स्थानीयस्तरमा आवतजावतलाई सहज बनाउन र ढुङ्गे–त्रिशूली जोड्ने मोटरेबल पुल निर्माणको लक्ष्य चाँडै पूरा हुनेमा विश्वस्त रहेको नगरपालिकाले जनाएको छ।