विदुरका ७ वडा जोड्ने ५० करोडको वैकल्पिक सडक स्तरोन्नतिका लागि सिफारिस

नुवाकोट । भोटेकोशी तथा त्रिशूली नदीमा आएको भिषण बाढीका कारण मुख्य सडक र पुलहरू क्षतिग्रस्त बनेपछि विदुर नगरपालिकाले ठूलो बजेटको वैकल्पिक मार्ग स्तरोन्नतिका लागि प्रक्रिया अघि बढाएको छ।

बाढीका कारण हाल प्रयोगमा रहेका वैकल्पिक सडकहरू समेत जोखिमपूर्ण, साँघुरो र जिर्ण बनेपछि त्रिशूली पारिका क्षेत्रमा सहज आवतजावत गराउन नगरपालिकाले रु. ५० करोडको नयाँ वैकल्पिक मार्ग छनौट गरी सडक डिभिजन कार्यालय, विदुरमा सिफारिस गरी पठाएको हो।

नगरप्रमुख राजन श्रेष्ठद्वारा हस्ताक्षरित पत्र अनुसार, ‘छत्रेखोलाबाट सिरखाली–रणभुवनेश्वरी–मानद्रेढुङ्गा–गौरीवेशी–कालीखोला–माझीगाउँ–कोलनी–आँगापुटार–तुप्चे–भित्रिनीटार–सिस्नेचौर हुँदै च्याम्पेद्वारा (किस्पाङ)’ जोड्ने सडक स्तरोन्नतिका लागि प्रस्ताव गरिएको छ।

यस योजनाले विदुर नगरपालिकाका वडा नं. १, ३, ६, ७, ८, ९ र १२ गरि कुल ७ वटा वडाहरूलाई प्रत्यक्ष रूपमा समेट्नेछ।

बाढीले पुर्‍याएको क्षतिपछि सर्वसाधारणले व्यहोर्नुपरेको आवतजावतको सास्तीलाई कम गर्न र त्रिशूली पारिका बस्तीहरूलाई जोड्ने गरी यो बृहत् गुरुयोजना तयार पारिएको नगरप्रमुख श्रेष्ठले जानकारी दिनुभयो।

लागत अनुमानसहित सडक डिभिजन कार्यालयमा पठाइएको यो योजना स्वीकृत भई कार्यान्वयनमा आएपछि यस क्षेत्रको यातायात व्यवस्थामा ठूलो सुधार आउने अपेक्षा गरिएको छ।