त्रिशूली सामुदायिक र नेसनल बेथेलद्वारा ऐतिहासिक भैरवी मन्दिर परिसरमा सरसफाइ

नुवाकोट । विद्यार्थीहरूमा आफ्नो इतिहास, संस्कृति र सम्पदाप्रतिको अपनत्व एवं जिम्मेवारी बोध गराउने उद्देश्यले नुवाकोटको प्रसिद्ध ऐतिहासिक तथा धार्मिक स्थल भैरवी मन्दिर परिसरमा सरसफाइ कार्यक्रम सम्पन्न भएको छ।

त्रिशूली सामुदायिक बोर्डिङ स्कूल र नेसनल बेथेल एकेडेमीको संयुक्त आयोजनामा शनिवार सो कार्यक्रम सञ्चालन गरिएको हो।

“हाम्रो सम्पदा, हाम्रो जिम्मेवारी” भन्ने नाराका साथ आयोजना गरिएको उक्त कार्यक्रममा दुवै विद्यालयका विद्यार्थीहरूले उत्साहजनक रूपमा सहभागी भई मन्दिर परिसरको सरसफाइ गरेका थिए।

पाठ्यपुस्तकका पानामा मात्र सीमित रहने सम्पदा संरक्षणको विषयलाई व्यावहारिक रूपमा अनुभव गराउन यो पहल गरिएको आयोजक विद्यालयहरूले जनाएका छन्। सरसफाइसँगै विद्यार्थीहरूलाई मन्दिरको ऐतिहासिक, धार्मिक तथा सांस्कृतिक महत्त्वका साथै स्थानीय सम्पदाको जगेर्नामा नयाँ पुस्ताको भूमिकाबारे समेत सचेत गराइएको थियो।

सम्पदा संरक्षण केवल सरकारी निकाय वा निश्चित संस्थाको मात्र नभई सम्पूर्ण समुदाय र युवा पुस्ताको साझा दायित्व भएकाले यस्ता कार्यक्रमले विद्यार्थीहरूमा नेतृत्व क्षमता, सामाजिक उत्तरदायित्व र सामूहिक भावनाको विकास गर्न सहयोग पुग्ने विश्वास व्यक्त गरिएको छ।

कार्यक्रममा दुवै विद्यालयका विद्यार्थीहरूले उत्साहजनक रूपमा सहभागी भई मन्दिर परिसरका कुनाकाप्चा सफा गरेका थिए। सरसफाइसँगै विद्यार्थीहरूले भैरवी मन्दिरको ऐतिहासिक पृष्ठभूमि, यसको धार्मिक महत्त्व र सांस्कृतिक धरोहरको रक्षा कसरी गर्ने भन्नेबारे नजिकबाट बुझ्ने र व्यावहारिक ज्ञान हासिल गर्ने अवसर पाए।

विद्यार्थीहरूको सक्रियता र समर्पणले “हाम्रो सम्पदा, हाम्रो जिम्मेवारी” भन्ने मूल मर्मलाई व्यवहारमै सार्थक बनाएको उपस्थित अभिभावक तथा स्थानीयले बताएका छन्।

पढाइसँगै समाज र संस्कृतिसँग जोड्ने यस्ता रचनात्मक पहलले आगामी दिनमा पनि निरन्तरता पाउने आशा आयोजक विद्यालयहरूले व्यक्त गरेका छन्।