महिलाहरुलाई जीविकोपार्जनको लागि तालिमसहित निशुल्क कुखुराको चल्ला वितरण

नुवाकोट । आयआर्जनमा सहयोग पु¥याउने उद्देश्यले नुवाकोटको विदुरका महिलाहरुलाई तालिमसहित निःशुल्क कुखुराको चल्ला वितरण गरिएको छ ।

नगर क्षेत्रमा रहेका आर्थिक रूपमा अशक्त महिलालाई व्यवसायमा जोड्दै आयआर्जनमा वृद्धि गराउने उद्देश्यले ३० जना महिलालाई कुखुराको चल्ला सहित दाना खुवाउने भाडो लगायतको प्रविधिको समेत वितरण गरिएको छ ।

सामाजिक रुपान्तरण नेपालको आयोजना तथा टेवा नेपालको आर्थिक सहयोगमा संचालन भएको तालिममा खुकुराको चल्लासहित कखुुरालाई दाना खुवाउने भाडो र प्लाष्टिकको पानी खुवाउने भाडा वितरण गरिएको सामाजिक रुपान्तरण नेपालका सचिव अम्बिका नेपालले जानकारी दिइन् ।

तालिमको समापन कार्यक्रममा बोल्दै विदुर नगरपालिकाकी उपप्रमुख प्रभा बोगटीले सरकारले ल्याएको नितिको कारण महिलाहरुको सम्पतिमाथि अधिकार स्थापित भएको बताइन् । उनले महिलाकै क्षेत्रमा काम गर्ने संघसंस्थाको नितरन्तर प्रयास, खवरदारी र राजनीतिक दलहरुले खेलेको भुमिकाको कारण आज महिलाको अवस्था सहज देखिएको उल्लेख गरिन् ।

उपप्रमुख बोगटीले स्थानिय सरकारको तर्फबाट आफुहरुले ग्रामिण भेगमा बाख्रा पालनदेखि शहरी भुभागमा कौसी खेतीजस्ता कार्यक्रमहरु संचालन गरिरहेको बताइन् ।

कार्यक्रममा विदुर नगरपालिका वडा नम्बर ४ का वडाध्यक्ष निलमबाबु ढङ्गेलले कुखुरापालन व्यवसायले आयआर्जनमा टेवा पुराउनुका साथै आत्मनिर्भर बन्न सहयोग पुराउने बताए ।

उनले ईच्छाशक्ति भए १० ओटा कुखुराबाट लाखपत्ति बन्न सक्ने बताए ।

यस्तै विदुर नगरपालिका वडा नम्बर ५ का वडाध्यक्ष लिलानाथ न्यौपानेले महिलाहरुलाई आर्थिक रुपमा शसक्तिकरण गर्नको लागि व्यवसायीक कुखुरापालन तालिमले महत्वपूर्ण भूमिका खेल्ने विश्वास व्यक्त गरे । वडाध्यक्ष न्यौपानेले व्यवसायिक रुपमा कुखुरा पालेर आत्मनिर्भर बनेमा इज्जत र पैसा दुबै कमाउन सकिने उल्लेख गरे ।

कार्यक्रममा सामाजिक रुपान्तरण नेपालका अध्यक्ष लक्ष्मी प्रधानले मासु र अण्डा उत्पादनका माध्यमबाट महिलालाई आयआर्जनमा सहयोग गर्ने उद्देश्यले कुखुराको चल्ला प्रदान गरिएको बताइन् ।

यसबाट महिलालाई आयआर्जनमा जोडिन सहयोग पुग्ने अपेक्षा गरिएको उनले बताइन् ।

तालिममा सहभागी भएकी कल्पना मिजारले अतिविपन्न परिवारको आयआर्जनमा यस्ता कार्यक्रमले सहयोग पुग्ने बताइन् ।
तालिममा भेटनरी डा. सुदिप कोइरालाले सहभागीहरुलाई प्रशिक्षण दिएका थिए । तालिममा विदुर नगरपालिका वडा नं ४ , ५ र ६ का ३० जनाको सहभागिता रहेको थियो ।

तालिममा समाजसेवी भगवान रानामगर, सन्तोष खनाललगायतको उपस्थिति रहेको थियो ।