नुवाकोट क्रसर उद्योग संघको अध्यक्षमा चित्रकार

नुवाकोट । नुवाकोट क्रसर उद्योग संघको अध्यक्षमा विष्णुकुमार चित्रकार निर्वाचित भएका छन् ।

शनिवार भएको संघको चौथो अधिवेशनले चित्रकारको संयोजकत्वमा ७ सदस्यीय कार्यसमिति निर्विरोध निर्वाचित गरेको हो ।
संघको उपाध्यक्षमा आत्मा श्रेष्ठ, सचिवमा संजोक दुराल र कोषाध्यक्षमा प्रकाश कुँवर निर्वाचित भएका छन् ।

यस्तै सदस्यहरुमा नवराज ढुङ्गाना, रामवावु जिसी र रमेश मिश्र चयन भएको निर्वाचन समितिले जनाएको छ ।

यस्तै संघको सल्लाहकारमा सुन्दर दुवाल, शिव अधिकारी, कृष्ण अधिकारी, राजाराम अधिकारी र राजेन्द्र श्रेष्ठ रहेका छन् ।

यसअघि संघको १२ औ साधारणसभा तथा चौथो अधिवेशनको उद्घाटन गर्दै नेपाल क्रसर तथा खानी उद्योग व्यवसायी महासंघका केन्द्रिय उपाध्यक्ष देवराज लइटेलले सरकारले क्रसर उद्योग नविकरण नगरे बन्द गर्नुपर्ने बताए । उनले क्रसर नवीकरण नभए उद्योगको तालाचाबी सरकारलाई बुझाउने चेतावनी समेत दिए ।

यस्तै नुवाकोट क्रसर उद्योग संघका निवर्तमान अध्यक्ष शिव अधिकारीले क्रसर उद्योगबाट जिल्लामा धेरै राजस्व उठ्ने गरेपनि व्यवसायीहरुलाई राज्यले हेर्ने नजर फरक परेको बताए । उनले व्यवसायिक हक हितको लागि सबै व्यवसायीहरु एकजुट हुनपर्ने बताए ।

नुवाकोटमा अहिले झण्डै दुई दर्जनभन्दा बढी क्रसर उद्योग दर्ता भएका छन् तर ति क्रसर उद्योग २०७२ सालदेखि नविकरण भएका छैनन् ।

क्रसर उद्योग नविकरण नहुँदा काम गर्न असहज भएको व्यवसायीहरुले गुनासो गरेका छन् ।