तारकेश्वरमा अध्यक्ष कप फुटबल प्रतियोगिता सुरु

नुवाकोट । तारकेश्वरकै ठूलो खेलकुद उत्सवको रुपमा स्थापित भएको ’गाउँपालिका अध्यक्ष कप फुटबल प्रतियोगिता शुरु भएको छ ।

प्रतियोगिताको तारकेश्वर गाउँपालिकाका अध्यक्ष शिव अधिकारीले उद्घाटन गरेका छन् । वडा नं १ को दाङसिङ जब्बरेचौरमा गाउँपालिकाद्वारा निर्मित दुबोसहितको आधुनिक खेलकुद रङ्गशालामा आयोजित प्रतियोगिताको उद्घाटन समारोहलाई सम्बोधन गर्दै अध्यक्ष अधिकारीले रङ्गशाला निर्माण गरी ’धुलोमा नभई दुबोमा खेलाउने’ आफ्नो संकल्प पुरा भएको भन्दै खुसी व्यक्त गरे ।

अध्यक्ष अधिकारीले रङ्गशालाका अतिरिक्त गाउँपालिकाको प्रशासकीय भवन अनेक अप्ठ्याराका बावजुद निर्माणको अन्तिम चरणमा पुगेको, १० सैयाको अस्पताल आफैंले शिलान्यास गरी द्रुत गतिमा निर्माण कार्य अघि बढिरहेको र दाङसिङ वासीको वर्षौं अघिदेखिको चाहना अनुरूप दाङसिङ माविमा १०+२ को कक्षा सञ्चालन गर्न सफल भएको स्मरण गर्दै आफूले लिएका संकल्प र प्रतिबद्धताहरूमा सम्पूर्ण लगाव र दृढताका साथ काम गरिरहेको बताए ।

अध्यक्ष अधिकारीले सबैलाई जोड्ने र सबैलाई चिनाउने सबैभन्दा उत्तम र शक्तिशाली माध्यम नै खेलकुद भएको बताउँदै युवावर्गको एकता, जागरण र सशक्तीकरणका लागि खेलकुदको विकास सदैव आफ्नो प्राथमिकतामा रहिआएको उल्लेख गरे ।
उनलेृ समृद्ध तारकेश्वरको अभियानमा आफू पूर्णरुपमा प्रतिबद्ध रहेको भन्दै सकारात्मक सोचका साथ सबै मिलेर विकासको अभियानमा हातेमालो गर्नुपर्नेमा जोड दिए ।