विदुर खानेपानी तथा सरसफाई उपभोक्ता संस्थाको अध्यक्षमा पुन : श्रेष्ठ

नुवाकोट । विदुर खानेपानी तथा सरसफाई उपभोक्ता संस्थाको अध्यक्षमा पुन संजीव बहादुर श्रेष्ठ निर्वाचित भएका छन् ।

शनिवार भएको संस्थाको नवौँ अधिवेशनको निर्वाचनको मत गणनाको अन्तिम मत परिणाम अनुसार अध्यक्षमा संजीव बहादुर श्रेष्ठ भारी मतले अध्यक्षमा निर्वाचित भएका हुन् । श्रेष्ठ नेकपा एमाले र नेपाली कांग्रेसको गठबन्धनबाट चुनाव लडेका थिए । अध्यक्षमा निर्वाचित भएका उनले उनले १ हजार ३ सय ७० मत प्राप्त गरे ।

उनका निकटतम प्रतिद्वन्द्वी हरिशरण गजुरेलले ७ सय ३७ मत प्राप्त गरे । गजुरेलको प्यानललाई नेपाली कम्युनिष्ट पार्टी, रास्वपा, राप्रपाको समर्थन थियो । उपाध्यक्षमा राजेन्द्र पाण्डे निर्वाचित भए । उनले १ हजार ६१ मत प्राप्त गरेका छन् । उनका निकटतम प्रतिद्वन्द्वी नविन प्रधानले ९ सय ६९ मत पाए ।

सचिवमा रघुनाथ रिमाल १ हजार ६१ मत ल्याएर विजयी भएका छन् । उनका निकटतम प्रतिद्वन्द्वी अच्चुतराज महन्त गिरीले ९ सय २२ मत प्राप्त गरे ।

कोषाध्यक्षमा अम्बिका चित्रकार खनालले १ हजार १ सय ६७ मतसहित विजयी भएकी छिन् । उनका निकटतम प्रतिद्वन्द्वी संगीता कोइरालाले ८ सय २५ मत प्राप्त ल्याइन् ।

महिला सदस्यतर्फ सिता अधिकारी र बिन्दाकुमारी सडौला निर्वाचित भएका छन् । अधिकारीले एक हजार एकसय ३ मत प्राप्त गरिन भने सडौलाले एक हजार ८५ मत प्राप्त गरिन् ।

त्यस्तै सदस्यमा शंकर पाण्डे, दिपक कुमार तिमिल्सिना र गोबिन्दबहादुर अधिकारी निर्वाचित भएका छन् । पाण्डेले एक हजार ६६ मत प्राप्त गरे भने तिमिल्सेनाले एक हजार ४४ र अधिकारीले ९ सय ४५ मत पाए ।

झण्डै ३ हजार ६ सय ६५ मतदाता रहेको निर्वाचनमा २ हजार ३ सय ४६ मत खसेको थियो । खसेको मतमध्ये एकसय एक मत बदर भएको निर्वाचन कार्यालयले जनाएको छ ।