राजीनामा दिन्न, अविश्वासको प्रस्ताव फेस गर्छु : मुख्यमन्त्री लामा

नुवाकोट । बागमती प्रदेश कांग्रेस संसदीय दलका नेतासमेत रहेका मुख्यमन्त्री बहादुरसिंह लामा (तामाङ)लाई हटाउन कांग्रेसकै २१ जना सांसदले हस्ताक्षर गरेका छन् ।

त्यसअघि सरकारमा रहेका चार मन्त्रीले राजीनामा दिएका थिए । चुनावबाटै प्रदेश संसदीय दलको नेता निर्वाचित भएका लामाले आफू राजीनामा नदिने तर अविश्वास प्रस्ताव आए फेस गर्ने चुनौती दिएका छन् ।

यसै सन्दर्भमा उनीसँग कुलचन्द्र न्यौपानेले गरेको संक्षिप्त कुराकानी ।

तपाईंलाई संसदीय दलको नेताबाट हटाउन आफ्नै पार्टीका सांसदहरुले हस्ताक्षर गरेका छन् । तपाईंको राजीनामा कहिले आउँछ ?

किन राजीनामा दिने ? म राजीनामा दिन्नँ । राजीनामा दिने कुरा गरेको छैन । म त काम गरिरहेको छु । चुनावबाट दलको नेता निर्वाचित भएको हुँ । अनि किन राजीनामा दिने ? अहिले मेराविरुद्ध जे गर्न खोजिएको छ, यो एउटा रोग हो । यसले पछि अरु प्रदेशमा अस्थिरता भित्र्याउँछ ।

तपाईं र इन्द्रबहादुर बाँनियाँबीच एक/एक वर्ष मुख्यमन्त्री हुने सहमति थियो, त्यसअनुसार राजीनामा दिन भनेर पार्टी सभापति शेरबहादुर देउवाले भन्दा पनि तपाईंले मान्नुभएन भनेर आइरहेको छ नि ?
त्यो सत्य होइन । मलाई कसैले छोड्न भनेर भनेको पनि छैन । एक/एक वर्ष मुख्यमन्त्री हुने सहमति भएको पनि होइन । सहमति भएको भए संसदीय दलको निर्वाचनमा किन चुनाव हुन्थ्यो । सहमतिमै भइन्थ्यो होला नि ! चुनावबाट निर्वाचित भएर म दलको नेता भएको हो । त्यसैले भाग्ने कुरा छैन । म दलको नेतामा अविश्वास प्रस्ताव आए फेस गर्छु । म भागेर हिँड्ने व्यक्ति होइन । दलको नेता हटेपछि गठबन्धनका बीच अर्को निर्णय नभएसम्म म मुख्यमन्त्री कायमै रहन्छु । दलको नेता र मुख्यमन्त्रीबाट राजीनामा दिने कुरै छैन ।

पार्टीभित्र बढ्दै गएको असन्तुष्टिको प्रभाव त बागमतीमा देखिएको होइन ?

त्यो त मलाई थाह छैन । म प्रदेशमा काम गरेको छु । अहिले यो बागमतीमा सुरु भएको छ । पार्टीका नेताहरुले यसलाई समर्थन गर्ने काम गरे यो रोग अरु प्रदेशमा पनि जान्छ र केन्द्रमा पनि सुरु हुन थाल्छ । संसदीय दलको नेता म पाँच वर्षका लागि निर्वाचित भएको हो । एक वर्षका लागि थियो भने पहिला चुनाव गर्न हुन्थेन । मैले पहिल्यै पनि भनेको हो, आधा–आधा कार्यकाल लिउँ चुनाव नगरौं भनेर । तर, उसले (इन्द्रबहादुर बानियाँ) ले चुनाव जित्छु भनेर लागे । तर, मैले चुनाव जितेँ । अहिले आएर सहमति थियो भनेर कसरी भन्न पाइन्छ ? म जहिल्यै चुनाव लडेर आएको व्यक्ति हो । विधि, विधानअनुसार म पाँच वर्षको लागि निर्वाचित दलको नेता हो । मैले छोड्ने कुरा हुन्न ।

अहिले बागमतीमा अर्थमन्त्रीले विवादस्पद रुपमा बजेट ल्याए । बेथितिको चाङ नै भित्र्याए र यो स्थिति आएको हो भन्ने छ नि ?

बजेट त जति दिए पनि नहुने रहेछ । सांसदले बजेट दिएपछि हालत के हुन्छ ? एक जनालाई सात/आठ करोडसम्म बजेट दिएको । प्रत्यक्षबाट निर्वाचित कसैले पनि पाँच करोड रुपैयाँ कमको बजेट पाएको छैन । समानुपातिक सांसदका लागि ३ करोडको बजेट दिइएको छ । तर, जति दिए पनि खुशी बनाउन नसकिने रहेछ ।

तपाईं हिजो संसदीय दलको नेता बन्दा शेरबहादुर देउवाकै टिमबाट हुनु भयो । अहिले त्यही टिमले तपाईंलाई हटाउन खोज्दै छ ? अब तपाईं कुन टिममा रहने ?

टिमको कुरा कहिले कतै भइन्छ, कहिले कतै । म अहिलेसम्म हिजो जहाँ थिएँ, त्यहीं छु । सधैं शेरबहादुर दाइको पक्षमा लागेर आएको हो । हिजो साथ दिँदै आएको हो । आजको दिनसम्म त्यहीं छु । तर, भोलिको दिनमा परिस्थिति के हुन्छ भन्न सकिन्न । पछिको परिस्थिति र समयले थाह हुन्छ । शेरबहादुर दाइ आफै अब फेरि सभापति नहुने भएपछि परिस्थिति अर्को हुनसक्छ ।

मुख्यमन्त्रीबाट हट्नका लागि सत्ता सहयात्री एमालेले पनि केही भनेको छ कि ?

छैन । म मुख्यमन्त्री छु । राजीनामा दिएका मन्त्रीहरुको ठाउँमा आज/भोलि नै अर्को मन्त्रीहरु नियुक्ति गर्छु । संयुक्त सरकारको नेतृत्व गर्नका लागि संसदीय दलको नेता नै हुनुपर्छ भन्ने छैन ।

त्यसैले मैले गठबन्धनले अर्को निर्णय नगर्दासम्म मुख्यमन्त्रीबाट राजीनामा दिने कुरा पनि छैन । दलको नेताबाट त झनै दिने कुरा नै भएन ।

कान्तिपुर दैनिकबाट ।