साउन लागेसँगै दुप्चेश्वरमा बढे भक्तजन

नुवाकोट । साउन लागेसँगै नुवाकोटको दुप्चेश्वर महादेवको मन्दिरमा दैनिक रूपमा भक्तजनहरू आउने क्रम बढी रहेको छ ।

पशुपतिनाथको पर्यायको रूपमा रहेको दुप्चेश्वर मन्दिरमा जानका लागि यातायातको सहजतासँगै भक्तजनहरू आउने क्रमसमेत बढिरहेको छ । यातायातको सहजतासँगै दुप्चेश्वर गाउँपालिका–६ रामतीस्थित करेजुङको ठुलो पहरामा रहेको दुप्चेश्वर महादेव मन्दिरमा साउनको पहिलो शनिवार मात्र एकै दिन झन्डै साँढे एक लाख रुपैयाँ भेटी सङ्कलन भएको छ । भक्तजनहरू बढेका कारण भेटी सङ्कलन पनि बढेको दुप्चेश्वर क्षेत्र विकास कोषले जनाएको छ ।

दुप्चेश्वरमा शनिवार एक लाख ३३ हजार आठ सय ८६ रुपैयाँ भेटी सङ्कलन भएको कोषका कोषाध्यक्ष राजकुमार श्रेष्ठले जानकारी दिए । उनका अनुसार मन्दिरमा मध्यान्ह आरतीको ५६ हजार चार सय ४० रुपैयाँ र क्युआर मार्फत एक हजार रुपैयाँ भेटी सङ्कलन भएको छ ।

दुप्चेश्वर मन्दिरमा भक्तजनले चढाएको भेटी प्रत्येक दिन बेलुकी ५ बजे गणना गर्ने कार्य भइरहेको छ । श्रेष्ठका अनुसार पछिल्लो समयदेखि मन्दिरमा आउने भक्तजनको उपस्थिति बढिरहेको र उचित व्यवस्थापनका लागि कोष तथा दुप्चेश्वर गापा कार्यालय क्रियाशील रहेको बताउनुभयो ।

यातायात र बाटोको प्रभावकारिताका कारण नुवाकोटको प्रसिद्ध तीर्थस्थल दुप्चेश्वर मन्दिरमा यति धेरै भेटी रकम सङ्कलन भएको हो । हिन्दु र बौद्ध धर्मावलम्वीहरुको आस्थाको केन्द्र ऐतिहासिक तथा धार्मिक महत्वको दुप्चेश्वर महादेव मन्दिरमा भक्तजनहरू आउने क्रममा बढोत्तरी भएसगै भेटी सङ्कलन कार्य बढिरहेको छ ।