नेपालकै दोस्रो तीनमुखे झोलुङ्गे पुलको नुवाकोटमा शिलान्यास

नुवाकोट। नुवाकोटको तादी र पञ्चकन्या गाउँपालिकाको संगमस्थल सुर्यमती र हेमवती नदीको संगम तादी दोर्खु दोभानमा निर्माण हुन लागेको नेपालकै दोस्रो तीनमुखे झोलुङ्गे पुलको शनिबार शिलान्यास गरिएको छ।

पूर्व अर्थमन्त्री प्रकाश शरण महतले पुलको शिलान्यास गरेका हुन्। स्थानीय समाजसेवी तथा नेपाली कांग्रेसका जिल्ला सदस्य कृष्ण प्र मिश्रका अनुसार उक्त पुलको कुल लागत भ्याट बाहेक ६ करोड ५८ लाख ५७ हजार रुपैयाँ रहेको छ। १५८ मिटर लम्बाइको यो पुल २०८३ साल असार महिनाभित्र निर्माण सम्पन्न गर्ने लक्ष्य राखिएको छ।

पुल निर्माणपछि पर्यटकीय क्षेत्रले हराभरा नुवाकोटको पूर्वी भेगमा पर्यटन प्रवर्द्धन गर्न सहयोग पुर्‍याउने विश्वास लिइएको छ। साथै, यसले सर्वसाधारण नागरिक र किसानलाई दैनिक जीवनयापनमा सहजता प्रदान गर्नेछ।

यो पुलले नुवाकोटका तादी, पञ्चकन्या र दुप्चेश्वरका स्थानीय बासिन्दाको जीवनस्तरमा सकारात्मक प्रभाव पार्ने बताइएको छ।