नुवाकोटको दुप्चेश्वरमा बसको ठक्करबाट एक जनाको मृत्यु

नुवाकोट । नुवाकोटको दुप्चेश्वर गाउँपालिका वडा नम्बर ३ राउतबेंसीमा बसको ठक्करबाट एक जनाको मृत्यु भएको छ ।

मृत्यु हुनेमा दुप्चेश्वर गाउँपालिका वडा नम्बर ३ स्थानीय रुपसानी तामाङ रहेको जिल्ला प्रहरी कार्यालय डिएसपी तिलक भारतीले जानकारी दिए । उनको उपचारको क्रममा काठमाण्डौमा मृत्यु भएको हो ।

शनविार विहान ८ वजे दुप्चेश्वरको पुरगाउँबाट त्रिशुलीतर्फ आउदै गरेको बा २ ख ६३८१ नम्बरको बसले बिपरित दिशातर्फ बाट जादै गरेको बागमती प्रदेश ०२–०२० प ४८५८ नम्बरको मोटरसाईकललाई ठक्कर दिएको थियो ।

वसको ठक्करबाट मोटरसाईकल चालक अक्सर तामाङ र उनकी श्रीमति रुपसानी तामाङ घाईते भएका थिए । घाइते भएका उनीहरुलाई तत्काल उपचारको लागि काठमाण्डौको ग्राण्डी अन्तराष्ट्रिय अस्पताल लगिएको थियो ।

घाइते अक्सर तामाङको उपचार भइहरको प्रहरीले जनाएको छ । घटना पश्चात बस लिखु गाउँपालिका वडा नम्बर ४ चौघडा बस्ने मुनहरी मगर र बसलाई प्रहरी नियन्त्रणमा लिइएको छ ।

घटनाको सम्बन्धमा थप अनुसन्धान जारी रहेको प्रहरीले जनाएको छ ।